Friday, April 23, 2010

அடுத்தமுறை கவனிக்க சில

ஆதியும் அந்தமும் இல்லாத 
வரிசை கோடுகளில் எறும்பு
சொல்லும் ஒழுக்கமும் நேர்த்தியும் 


ஈரபசை காற்றோடு மோதும் 
மண்வாசம் சொல்லும் நெருங்கி 
வரும் மழையின் வருகையை 


பேருந்து பயணத்தில் தாயின் 
தோளில் இருந்து சினேகபுன்னகை
உதிர்க்கும் பிஞ்சுகுழந்தை 

பள்ளி வாசலில் கலங்கி செல்லும்
அம்மாவும் கையசைத்து உள் ஓடும்
புத்தகபை சுமைதாங்கியும்


தூரத்து பயணத்தில் தூங்காமல் 
கண்மூட  காதுக்குள் தாளமிடும்  
பிரியமான இசையொலி  


பிடித்தமான கோயிலில் 
ஆழமான அமைதியில் திடீரென 
கேட்கும் கோயில் மணியோசை 


திருவிழா சலசலப்பு முடிந்த காலி   
மைதானத்தில் குதித்து விளையாடும் 
ஆட்டு குட்டிகள் சில 

 சுவாசிப்பது மட்டும் அல்ல 
 நேசிக்கவும்  நிறைய கொட்டி கிடக்குது
 நம்மை சுற்றி ,காற்று போல் கலந்து! 

No comments:

Post a Comment